សូមថ្លែងអំណរគុណដល់ក្រុមការងារទាំងអស់ ទាំងក្រុមការងារក្រសួងមុខងារសាធារណៈ ក្រសួងពាក់ព័ន្ធ លោកគ្រូ អ្នកគ្រូជាអ្នកតាក់តែងវិញ្ញាសា ក្រុមការងារនៃសកលវិទ្យាល័យភូមិន្ទភ្នំពេញ អាជ្ញាធរមានសមត្ថកិច្ច មន្ត្រីសុខាភិបាល រួមជាមួយក្រុមការងារពាក់ព័ន្ធទាំងអស់ ដែលបានចូលរួមគាំទ្រដំណើរការការប្រឡងប្រជែង សម្រេចបានលទ្ធផលគួរជាទីមោទនៈ។ លើសពីនេះ ក៏សូមថ្លែងអំណរគុណដល់បេក្ខជន និងអាណាព្យាបាលទាំងអស់ ដែលបានសហការចូលរួមជាមួយការរៀបចំរបស់គណៈកម្មការរៀបចំការប្រឡងប្រជែង។

សន្លឹកកិច្ចការរបស់បេក្ខជន ត្រូវបានរៀបចំខ្ចប់ដោយសម្ងាត់ និងរក្សាទុកក្នុងបន្ទប់មានសុវត្ថិភាពបំផុត ក្រោមការឃ្លាំមើលពីអង្គភាពប្រឆាំងអំពើពុករលួយ និងក្រុមការងារត្រួតពិនិត្យ និងវាយតម្លៃការប្រឡងប្រជែង។ កំណែសន្លឹកកិច្ចការរបស់បេក្ខជននឹងត្រូវដំណើរការចាប់ពីព្រឹកថ្ងៃទី២៦ ខែវិច្ឆិកា ឆ្នាំ២០២៤ នៅសាលាភូមិន្ទរដ្ឋបាល៕