គណៈកម្មការរៀបចំការប្រឡងប្រជែង បានជួបប្រជុំវាយតម្លៃបូកសរុបការងារ និងសិក្សាអំពីបទពិសោធន៍នៃការរៀបចំការប្រឡងប្រជែងជ្រើសរើសមន្ត្រីរាជការស៊ីវិលឱ្យចូលបម្រើការងារក្នុងក្របខណ្ឌអង្គភាពប្រឆាំងអំពើពុករលួយ ក្រសួងសាធារណការ និងដឹកជញ្ជូន និងក្រសួងកសិកម្ម រុក្ខាប្រមាញ់ និងនេសាទ ដែលទើបតែបញ្ចប់កាលពីពេលថ្មីៗនេះ។ កិច្ចប្រជុំនេះបានប្រព្រឹត្តទៅនាព្រឹកថ្ងៃទី១៨ ខែមីនា ឆ្នាំ២០២៤ ដឹកនាំដោយ ឯកឧត្តម យក់ ប៊ុនណា រដ្ឋលេខាធិការប្រចាំការ ជាតំណាងដ៏ខ្ពង់ខ្ពស់ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ រួមជាមួយនឹងឯកឧត្តម លោកជំទាវ លោក លោកស្រី ប្រធាន អនុប្រធាន និងសមាជិកនៃគណៈកម្មការ និងអនុគណៈកម្មការនានាជាច្រើនរូបទៀត។ កិច្ចប្រជុំកាលពីព្រឹកមិញនេះ បាននាំមកនូវការចែករំលែកបទពិសោធន៍ រួមជាមួយនឹងបញ្ហាប្រឈមដែលគណៈកម្មការបានជួបប្រទះ ហើយស្វែងរកដំណោះស្រាយឱ្យកាន់តែប្រសើរ សម្រាប់ការប្រឡងប្រជែងនាពេលខាងមុខ។