នារសៀលថ្ងៃទី១៥ ខែមីនា ឆ្នាំ២០២៤ សាលាភូមិន្ទរដ្ឋបាល និងមជ្ឈមណ្ឌលសហប្រតិបត្តិការបារាំងប្រចាំសាកលវិទ្យាល័យភូមិន្ទនីតិសាស្ត្រនិងវិទ្យាសាស្ត្រសេដ្ឋកិច្ចនៅភ្នំពេញ បានរៀបចំសន្នីសីទអន្តរជាតិ ស្តីពី«បរិវត្តកម្មមុខងារសាធារណៈ» ក្រោមវត្តមានឯកឧត្តម យក់ ប៊ុនណា រដ្ឋលេខាធិការប្រចាំការនៃក្រសួងមុខងារសាធារណៈ និងជានាយកសាលាភូមិន្ទរដ្ឋបាល និង Mr Fabrice Etienne ទីប្រឹក្សាទី១នៃស្ថានទូតបារាំងប្រចាំព្រះរាជាណាចក្រកម្ពុជា ដោយមានការចូលរួមពីលោកបណ្ឌិត Michel Guillot សាស្ត្រចារ្យនីតិសាធារណៈនៃសាកលវិទ្យាល័យលុយមីញ៉ែលីយ៉ុង២ នៃប្រទេសបារាំង Mr Laurent MESMANN ទីប្រឹក្សាពិសេសរបស់សាកលវិទ្យាធិការសាកលវិទ្យាល័យភូមិន្ទនីតិសាស្ត្រ និងសេដ្ឋកិច្ច និងជាប្រធានគម្រោងកិច្ចសហប្រតិបត្តិការបារាំង រួមទាំងមានវាគ្មិនជាតិ ភ្ញៀវជាតិ អន្តរជាតិ និងមន្ត្រីរាជការ និងកម្មសិក្សាការីមន្ត្រីជាន់ខ្ពស់ឆ្នាំ២០២៤ របស់សាលាភូមិន្ទរដ្ឋបាលជាច្រើនរូបទៀត។ នាឱកាសនោះឯកឧត្តម យក់ ប៊ុនណា បានឱ្យដឹងថា គោលបំណងក្នុងការរៀបចំសន្និសីទនេះ ដើម្បីចែករំលែកចំណេះដឹង បទពិសោធ និងឧត្តមានុវត្ត ស្តីពីបរិវត្តកម្មមុខងារសាធារណៈ តាមរយៈទិដ្ឋភាពរដ្ឋបាលសាធារណៈប្រៀបធៀប ជូនដល់ថ្នាក់ដឹកនាំ មន្ត្រីជាន់ខ្ពស់ និងមន្ត្រីជំនាញកម្ពុជា ដែលទទួលបន្ទុការងារពាក់ព័ន្ធនឹងកំណែទម្រង់ ជាពិសេសនៅដើមអាណត្តិរបស់រាជរដ្ឋាភិបាល នីតិកាលទី៧ នៃរដ្ឋសភា ដើម្បីជួយអភិវឌ្ឍសមត្ថភាពក្នុងការបំពេញការងារដឹកនាំ និងអនុវត្តន៍ប្រកបដោយប្រសិទ្ធភាព ស្របទៅតាមយុទ្ធសាស្ត្របញ្ចកោណ ដំណាក់កាលទី១។