នៅថ្ងៃទី១១ ខែមករា ឆ្នាំ២០២៤ ឯកឧត្តម សៀត វិចិត្រ អគ្គលេខាធិការរងនៃអគ្គលេខាធិការដ្ឋានគណៈកម្មាធិការកែទម្រង់រដ្ឋបាលសាធារណៈ នៃក្រសួងមុខងារសាធារណៈ បានដឹកនាំគណៈកម្មការបច្ចេកទេសអន្តរក្រសួងនិងក្រុមការងារលេខាធិការនៃ គ.វ.ជ. ចុះអនុវត្តការវាយតម្លៃនៅទីតាំងជាក់ស្ដែងបេក្ខភាពអនុវិទ្យាល័យ ក្នុងស្រុកឯកភ្នំ នៃខេត្តបាត់ដំបង។ ក្នុងដំណើរការវាយតម្លៃនេះ មានការចូលរួមដោយ គណៈកម្មការបច្ចេកទេសអន្តរក្រសួងនិងក្រុមការងារលេខាធិការនៃគ.វ.ជ. នាយករងរដ្ឋបាលខេត្ត តំណាងមន្ទីរអប់រំ យុវជន និងកីឡា តំណាងមន្ទីរមុខងារសាធារណៈ តំណាងមន្ទីរបរិស្ថាន អភិបាលរងស្រុកឯកភ្នំ ប្រធានការិយាល័យអប់រំ យុវជន និងកីឡាស្រុកឯកភ្នំ មេឃុំនិងក្រុមប្រឹក្សាឃុំ នាយប៉ុស្ដិ៍ គណៈកម្មការគ្រប់គ្រងសាលារៀន តំណាងមាតាបិតាសិស្ស តំណាងសហគមន៍ នាយក នាយករង-នាយិការង និងលោកគ្រូ អ្នកគ្រូនៃអនុវិទ្យាល័យ។

ជាលទ្ធផល ដោយសារមានការសហការយ៉ាងល្អពីគ្រប់ភាគីពាក់ព័ន្ធ គណៈកម្មការបច្ចេកទេសអន្តរក្រសួង នៃ គ.វ.ជ. បានធ្វើការចុះវាយតម្លៃជាក់ស្ដែងដល់ទីតាំង បានបញ្ចប់ដោយជោគជ័យ និងប្រកបដោយបរិយាកាសរីករាយ៕