កិច្ចប្រជុំបានប្រព្រឹត្តទៅ នៅព្រឹកថ្ងៃទី២៧ ខែធ្នូ ឆ្នាំ២០២៣ នៅទីស្តីការក្រសួងមុខងារសាធារណៈ ដោយមានការចូលរួមពីសំណាក់ ឯកឧត្តម លោកជំទាវ លោក លោកស្រី ជាអនុប្រធាន សមាជិកនៃគណៈកម្មការកំណែទម្រង់វិមជ្ឈការ និងវិសហមជ្ឈការ ដែលមានសមាសភាពចូលរួមពី រដ្ឋលេខាធិការ អនុរដ្ឋលេខាធិការ អគ្គនាយក និងថ្នាក់ដឹកនាំរបស់ក្រសួងមុខងារសាធារណៈ ព្រមទាំងតំណាងក្រសួងអប់រំ យុវជន និងកីឡា ក្រសួងសេដ្ឋកិច្ចនិងហិរញ្ញវត្ថុ និងក្រសួងមហាផ្ទៃ សរុបប្រមាណ ៦០នាក់។

ឯកឧត្តមប្រធាន បានរម្លឹកពីរបាយការណ៍វឌ្ឍនភាពការងារនៃកិច្ចប្រជុំពិភាក្សាកន្លងមក និងមានប្រសាសន៍តម្រង់ទិសជូនអង្គប្រជុំពីកិច្ចការងារដែលនឹងត្រូវពិភាក្សាក្នុងការអនុវត្តបន្ត ទៅលើរបៀបវារៈទាំង២ រួមមាន៖
១.ពិនិត្យលើការងារសមាហរណកម្ម ផ្ទេរបុគ្គលិកសិក្សានៃគ្រឹះស្ថានមត្តេយ្យសិក្សាសាធារណៈ និងគ្រឹះស្ថានបឋមសិក្សាសាធារណៈទៅឱ្យរដ្ឋបាលក្រុង ស្រុក ខណ្ឌ។
២.ពិនិត្យពិភាក្សាលើសេចក្តីព្រាងសេចក្ដីណែនាំអន្តរក្រសួង ស្តីពីលក្ខខណ្ឌ លក្ខណៈវិនិច្ឆ័យ យន្តការ និងនីតិវិធីនៃការតែងតាំងនាយក នាយិកា នាយិការង នៃគ្រឹះស្ថានមត្តេយ្យសិក្សាសាធារណៈ និងបឋមសិក្សាសាធារណៈ។

អង្គប្រជុំបានចូលរួមផ្តល់ជាមតិយោបល់ជាធាតុចូលជាច្រើនពីតំណាងក្រសួង-ស្ថាប័ន នីមួយៗក៏បានរាយការណ៍ពីស្ថានភាពរបាយការណ៍វឌ្ឍនភាព និងបញ្ហាប្រឈម និងឯកភាពទៅលើចំណុចសំខាន់ៗ រួមមាន៖
១)កំណត់ចំនួននៃការផ្ទេរបុគ្គលិកសិក្សា មតេយ្យ និងបឋម ទៅឱ្យរដ្ឋបាលក្រុង ស្រុក ខណ្ឌ
២)នីតិវិធីនៃការផ្ទេរបុគ្គលិកសិក្សា
៣)នីតិវិធីនៃការគ្រប់គ្រងស្ថានភាពគ្រូបង្រៀនថ្នាក់ក្រោមជាតិ
៤)នីតិវិធីនៃការបើកប្រាក់បៀវត្សជូនគ្រូបង្រៀន
៥)នីតិវិធីនៃការចេញដីការរបស់ក្រុង ស្រុក
៦)ទម្រង់នៃការតែងតាំង និងលក្ខខណ្ឌនៃការតែងតាំង និង
៧)យន្តការអនុលោម និងនីត្យានុកូលភាព៕