ឯកឧត្តម សៀត វិចិត្រ អគ្គលេខាធិការរង នៃអគ្គលេខាធិការដ្ឋានគណៈកម្មាធិការកែទម្រង់រដ្ឋបាលសាធារណៈ ក្រសួងមុខងារសាធារណ បានដឹកនាំគណៈកម្មការត្រួតពិនិត្យកិច្ចការទូទៅ គណៈកម្មការបច្ចេកទេសអន្តរក្រសួងនៃគ.វ.ជ. និងក្រុមការងារលេខាធិការនៃគ.វ.ជ. ចុះអនុវត្តដំណើរការវាយតម្លៃនៅទីតាំងជាក់ស្ដែងរបស់បេក្ខភាពមណ្ឌល សុខភាព តាមបណ្តាខេត្តនានា។ ក្នុងដំណើរការវាយតម្លៃនេះ មានការចូលរួមដោយ ឯកឧត្តម អភិបាលរង នៃគណៈអភិបាលខេត្ត សមាជិកក្រុមប្រឹក្សាខេត្ត តំណាងមន្ទីរមុខងារសាធារណៈ តំណាងមន្ទីរ សុខាភិបាល តំណាងមន្ទីរសេដ្ឋកិច្ច និងហិរញ្ញវត្ថុ តំណាងអភិបាល នៃគណៈអភិបាលស្រុក តំណាងការិយាល័យស្រុកប្រតិបត្តិ នៃរដ្ឋបាលស្រុក គណៈកម្មការគ្រប់គ្រង មណ្ឌសុខភាព និងបុគ្គលិក មណ្ឌលសុខភាព។

ការវាយតម្លៃនៅទីតាំងជាក់ស្ដែងរបស់បេក្ខភាពមណ្ឌលសុខភាពខាងលើ ក្នុងគោលបំណងពិនិត្យផ្ទៀងផ្ទាត់ទិន្នន័យសាកសួរព័ត៌មានពីភាគីពាក់ព័ន្ធ និងវាយតម្លៃដាក់ពិន្ទុនៅទីតាំងជាក់ស្ដែងរបស់បេក្ខភាព ដោយមានការបែងចែកជាក្រុមគោលដៅដើម្បីធ្វើការវាយតម្លៃដោយផ្ដោតលើលក្ខណៈវិនិច្ឆ័យគោលចំនួន៨ រួមមាន៖ ១.ស្ដង់ដាសេវាសាធារណៈ ២.និយាមនៃការផ្ដល់សេវាសាធារណៈក្នុងវិស័យសុខាភិបាល ៣.ការគ្រប់គ្រងហិរញ្ញវត្ថុសាធារណៈនៅក្នុងអង្គភាព ៤.ការគ្រប់គ្រងនិងការអភិវឌ្ឍធនធានមនុស្សនៅក្នុងអង្គភាព ៥.ការរៀបចំនិងកែលម្អបរិស្ថានអង្គភាព ៦.ទំនាក់ទំនងល្អជាមួយប្រជាពលរដ្ឋ សហគមន៍ និងដៃគូអភិវឌ្ឍ ព្រមទាំងការចូលរួមវាយតម្លៃពីអ្នកប្រើប្រាស់សេវាសាធារណៈ ៧.ការដោះស្រាយបញ្ហាប្រឈមជាមួយប្រជាពលរដ្ឋនិងសហគមន៍ និង៨.ការផ្តួចផ្ដើមគំនិតថ្មីៗ និងនវានុវត្តន៍ ដើម្បីធ្វើឱ្យអង្គភាពមានដំណើរការកាន់តែប្រសើរ។

ជាលទ្ធផល គណៈប្រតិភូ និងសមាសភាពគ្រប់ភាគីដែលបានចូលរួមក្នុងដំណើរការវាយតម្លៃនេះ បានសហការគ្នាយ៉ាងល្អប្រសើរ ដែលនាំឱ្យដំណើរការវាយតម្លៃបានបញ្ចប់ដោយជោគជ័យ និងប្រកបដោយបរិយាកាសរីករាយនិងស្និទស្នាលបំផុត៕