ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត ផ្តល់សារគន្លឹះ ជុំវិញ ការតែងតាំងមន្ត្រី “គុណធម៌ និងអភិក្រមការងារ គឺជាការថែរក្សា តុល្យភាពប្រតិបត្តិការការងារ និងធានានិរន្តរភាព ឆ្ពោះទៅមុខ។”

នាព្រឹកថ្ងៃទី១ ខែកញ្ញា ឆ្នាំ២០២៣ ឯកឧត្តម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានចូលរួមក្នុងពិធីជួបសំណេះសំណាលជាមួយនឹងកម្មករ និយោជិត មកពីរោងចក្រ/សហគ្រាស ក្រោមអធិបតីភាពដ៏ខ្ពង់ខ្ពស់របស់ ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។

ថ្លែងក្នុងពិធីជួបសំណេះសំណាល ដែលមានអ្នកចូលរួមសរុបជិត ២ម៉ឺននាក់ ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត បានកត់សម្គាល់លើការការរៀបចំថ្នាក់ដឹកនាំដែលជាក្បាលម៉ាស៊ីនរាជរដ្ឋាភិបាលតាមរយៈការ តែងតាំងមន្ត្រី ការប្រគល់ភារកិច្ច ឬការរៀបចំតួអង្គដឹកនាំជាដើម។ ឯកឧត្តមកិត្តិទេសាភិបាលបណ្ឌិត បានលើកឡើងថា «… គុណធម៌នៃការតែងតាំង ឬការគោរពអភិក្រមការងារដើម្បីរក្សាតុល្យភាពនៃប្រតិបត្តិការការងារ និងធានានិរន្តរភាពរដ្ឋឆ្ពោះទៅមុខ។»