(សិង្ហបុរី)៖ ក្នុងថ្ងៃដំបូងនៃការបំពេញទស្សនកិច្ចសិក្សា​ស្តីពី «ការផ្លាស់ប្តូរឧត្តមានុវត្តន៍​ក្នុង​វិស័យ​មុខងារសាធារណៈ» នៅថ្ងៃទី២៨ ខែមីនា ឆ្នាំ២០២២ ឯកឧត្តម ព្រុំ សុខា រដ្ឋមន្រ្តីក្រសួង​មុខងារ​សាធារណៈ បានជួបពិភាក្សាការងារ​ជាមួយឯកឧត្តម ចាន់ ជុនស៊ីង (Chan Chun Sing) រដ្ឋមន្រ្តី​ក្រសួងអប់រំសិង្ហបុរី ទទួលបន្ទុកការងារមុខងារសាធារណៈ។​​​​​​​​​​​​​​​ ​​​​​​​

ក្នុងជំនួបនេះ ឯកឧត្តមរដ្ឋមន្រ្តី ព្រុំ សុខា បានវាយតម្លៃខ្ពស់ពីកិច្ច​សហប្រតិ​បត្តិ​ការទ្វេ​ភាគីដ៏ល្អប្រសើរ រវាងកម្ពុជា និងសិង្ហបុរី ជាពិសេសក្នុងក្របខ័ណ្ឌ​កិច្ចសហប្រតិបត្តិការ​​មុខងារសា​ធារណៈ​អាស៊ាន នាពេលកន្លងមក។ ទន្ទឹមនោះ ឯកឧត្តមរដ្ឋមន្ត្រីប្រទេសទាំងពីរ បានយល់ស្របក្នុងការពង្រឹង​កិច្ចសហប្រតិបត្តិការ​ដែលមានស្រាប់​ក្នុងក្របខ័ណ្ឌអាស៊ាន និងប្តេជ្ញា​ពង្រីក​កិច្ចសហ​ប្រតិបត្តិការក្នុងក្រប​ខ័ណ្ឌ​ទ្វេភាគីបន្ថែម​ទៀត។

បន្ទាប់មក ប្រតិភូបានជួបពិភាក្សាការងារ​​ជាមួយផ្នែក​សេវាសាធារណៈ (Public Service Division) នៃទីស្តីការនាយករដ្ឋ​មន្ត្រី​សិង្ហបុរី។ លោក គ្រីស្តូហ្វ័រ ប្រាហ្គាសាម (Christopher Pragasam) ប្រធាន​​ផ្នែកទំនាក់ទំនង​អន្តរជាតិ និងសហការី ​បានធ្វើបទបង្ហាញស្តីអំពី​ ស្ថានភាពទូទៅ​នៃ​ប្រព័ន្ធ​គ្រប់គ្រងមន្ត្រីសាធារណៈ និង​ការផ្តល់សេវាសាធារណៈ​របស់សិង្ហបុរី។

ឯកឧត្តម សុខ ខឿន ឯក​អគ្គរាជទូតកម្ពុជា ប្រចាំនៅសិង្ហបុរី ក៏បានអមដំណើរប្រតិភូក្នុង​កម្មវិធី​ទស្សនកិច្ច​​ថ្ងៃ​ដំបូង​នេះ​ផង​ដែរ។ ទស្សនកិច្ចសិក្សា​នេះ​នឹងបន្តនៅថ្ងៃទី​២៩ ខែមីនា ឆ្នាំ២០២២ ទៀត៕