ឯកឧត្តមរដ្ឋមន្ត្រីក្រសួងមុខងារសាធារណៈដឹកនាំប្រតិភូអង្គភាពវាយតម្លៃសេវាសាធារណៈចុះពិនិត្យការងារប្រយុទ្ធជំងឺកូវីដ១៩ នៅមន្ទីរពេទ្យខេត្តកោះកុង


ខេត្តកោះកុង៖ នាព្រឹកថ្ងៃសុក្រ ២រោច ខែពិសាខ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី០៨ ខែឧសភា ឆ្នាំ២០២០នេះ ឯកឧត្តមរដ្ឋមន្ត្រី ព្រុំ សុខា រួមដំណើរដោយ ឯកឧត្តម លោក លោកស្រី រដ្ឋលេខាធិការ អនុរដ្ឋលេខាធិការ អគ្គនាយក អគ្គនាយករង និងមន្ត្រីរាជការនៃអង្គភាពវាយតម្លៃសេវាសាធារណៈ នៃក្រសួងមុខងារសាធារណៈបានចុះទៅពិនិត្យស្នាដៃការងាររបស់គ្រូពេទ្យ និងបុគ្គលិកនៃមន្ទីរពេទ្យខេត្តកោះកុង ក្នុងការប្រយុទ្ធជំងឺកូវីដ១៩ ។


ក្រោយពីរបាយការណ៍របស់ លោក ហៃ ឡៃសុង ប្រធានមន្ទីរពេទ្យខេត្តកោះកុងពីស្នាដៃការងាររបស់គ្រូពេទ្យ និងបុគ្គលិកមន្ទីរពេទ្យខេត្តកោះកុងក្នុងការប្រយុទ្ធជំងឺកូវីដ១៩ និងមតិស្វាគមន៍របស់ លោកជំទាវ មិថុនា ភូថង អភិបាល នៃគណៈអភិបាលខេត្តកោះកុង រួចមក ឯកឧត្តមរដ្ឋមន្ត្រី ព្រុំ សុខា បានថ្លែងកោតសរសើរចំពោះកិច្ចសហការរវាងអាជ្ញាធរមានសមត្ថកិច្ចនៃរដ្ឋបាលដែនដីខេត្តជាមួយផ្នែកជំនាញសុខាភិបាលខេត្ត ពិសេសមន្ទីរពេទ្យខេត្តកោះកុងដោយបានទទួលការចូលរួម ជ្រោមជ្រែងជាទូទៅពីមន្ត្រីរាជការ និងប្រជាពលរដ្ឋក្នុងខេត្ត ដែលបានសម្រេចលទ្ធផលការងារយ៉ាងល្អប្រសើរក្នុងការពិនិត្យព្យាបាលជំងឺជូនប្រជាជន សាកសមជាអង្គភាពគំរូដែលធ្លាប់បានទទួលជ័យលាភីលេខ១ កម្រិត២ ក្នុងឆ្នាំកន្លងទៅ។ ស្នាដៃនេះពិតជាបានរួមចំណែកពង្រឹងសុខភាពសាធារណៈ បង្ការ ទប់ស្កាត់ និងព្យាបាលបានទាន់ពេលវេលាមិនឱ្យមេរោគកូរ៉ូណាថ្មីនៃជំងឺកូវីដ១៩ ឆ្លងចូលសហគមន៍ក្នុងខេត្តកោះកុង ។ ជាក់ស្តែង អ្នកសង្ស័យផ្ទុកមេរោគចំនួន៦៥នាក់ និងអ្នកដែលមានជំងឺកូវីដ១៩ ចំនួន២នាក់ ត្រូវបានថែទាំ ពិនិត្យ ព្យាបាលយ៉ាងយកចិត្តទុកដាក់ និងបានជាសះស្បើយជាស្ថាពរទាំងអស់គ្នា។


ក្នុងឱកាសនោះដែរ ឯកឧត្តមរដ្ឋមន្ត្រី បានរំលឹកថាទោះបីមកដល់ពេលនេះយើងទទួលបានលទ្ធផលល្អក្នុងការប្រយុទ្ធនឹងជំងឺ​កូវីដ១៩ក៏ដោយក្តី ប៉ុន្តែដោយសារជំងឺឆ្លងជាសកលដ៏កាចសាហាវនេះ នៅតែជាគ្រោះថ្នាក់ដែលកំពុងបន្តគំរាមកំហែងអាយុជីវិតប្រជាជនទូទាំងពិភពលោកនៅឡើយនោះ អាជ្ញាធរដែនដី សមត្ថកិច្ចជំនាញសុខាភិបាលរបស់យើងត្រូវពង្រឹងកិច្ចសហការឱ្យកាន់តែបានខ្លាំងក្លាថែមទៀត ដោយមិនត្រូវបន្ធូរដៃក្នុងការអប់រំវេជ្ជសាស្ត្រ លើកកម្ពស់ស្មារតីប្រុងប្រយ័ត្នជាប្រចាំ និងប្រមូលផ្តុំឱ្យបាននូវកម្លាំងសាមគ្គីរបស់ប្រជាពលរដ្ឋគ្រប់ស្រទាប់ចូលរួមបន្តប្រយុទ្ធឱ្យឈ្នះជំងឺកូវីដ១៩ ទន្ទឹមនឹងតស៊ូ ពុះពាររាល់ការលំបាកជាបណ្តោះអាសន្ន ដែលបណ្តាលមកពីផលប៉ះពាល់នៃកូវីដ១៩ ដើម្បីអនាគតល្អប្រសើររបស់សង្គមជាតិ និងប្រជាជនយើង។


នៅចុងបញ្ចប់ ប្រតិភូក្រសួងមុខងារសាធារណៈក៏បាន​ជួបសំណេះសំណាលជាមួយមន្ត្រីរាជការនៃមន្ទីរមុខងារសាធារណៈខេត្តផងដែរ។